MPSU, itinampok ang pagpapahalaga sa Wikang Filipino sa gitna ng pag-usbong ng AI

Ipinagdiwang ng Mountain Province State University (MPSU) ang Buwan ng Wika 2026 ngayong Setyembre 2 sa MPSU Bontoc Admin Lobby, na may temang “Wikang Filipino at AI: Kasangkapan sa Pananaliksik at Tulay sa Yaman ng Impormasyon.”

Tampok sa pagdiriwang ang panawagan na patuloy na pahalagahan ang wikang Filipino at kulturang sariling atin kasabay ng responsable at makabuluhang paggamit ng artificial intelligence (AI) sa pagkatuto at pananaliksik.

Kinatawan ni University President Dr. Edgar G. Cue si Chief-of-Staff Dr. Karen B. Cue, na binigyang-diin ang paggamit ng AI bilang katuwang sa pagpapalawak ng kaalaman, habang nananatiling mahalaga ang wika, kultura, at pagpapasya ng tao sa paggamit ng teknolohiya.

Samantala, isinagawa rin ang iba’t ibang patimpalak tulad ng pagsulat ng sanaysay, pagkukuwento, tulang bigkas, dramatikong monologo, at dalawahang pag-arte upang maipamalas ng mga kalahok ang kanilang husay sa paggamit ng wikang Filipino.

Sa pagdiriwang, muling binigyang-diin ng MPSU ang mahalagang papel ng wikang Filipino at kultura sa gitna ng mabilis na pag-unlad ng teknolohiya at AI.