Ipinagdiwang ng Mountain Province State University-Tadian ang Buwan ng Wika 2026 noong Setyembre 4 sa IPED Building, tampok ang temang “Wikang Filipino at AI: Kasangkapan sa Pananaliksik at Tulay sa Yaman ng Impormasyon.”
Naging tampok sa programa ang mga patimpalak na Isahang Pag-awit, Dagliang Talumpati, Masining na Pagkukuwento, at Balagtasan, kung saan ipinamalas ng mga kalahok ang kanilang husay sa paggamit ng wikang Filipino.
Sa mensahe ni MPSU President Dr. Edgar G. Cue na binasa ni Dr. Martin T. Wapan, miyembro ng kaguruan ng College of Teacher Education, binigyang-diin ang kahalagahan ng paggamit ng AI bilang kasangkapan sa pananaliksik at pagkatuto nang hindi isinasantabi ang wika, kultura, at pagkakakilanlan.
Aniya, maaaring makatulong ang AI sa pagpapalawak ng kaalaman, ngunit tao pa rin ang dapat magtakda ng direksiyon at kabuluhan ng teknolohiya.
Samantala, kinatawan ni College of Teacher Education Dean Dr. Oliver Dominguez si Tadian Campus Administrator Dr. Brent Greg E. Gomuad para sa pambungad na mensahe, habang nagbigay naman ng pangwakas na mensahe si Dean ng College of Agriculture and Forestry Dr. Alver W. Claudio.
Sa kabila ng pagiging huli ng pagdiriwang ngayong taon, iginiit sa mensahe ni Cue na hindi nakatakda sa kalendaryo ang pagpapahalaga sa wika at kultura—sapagkat bahagi ito ng pagkakakilanlan na dapat patuloy na isabuhay at ipasa sa susunod na henerasyon.
